BUNGOENG BAN KEUMANG

kareuna ceudah bungoeng ban keumang,
rame that kumbang keunan troeh teuka,
meunan umpama haba geu karang, 
geuboeh tamselan keu adek dara,


bungoeng yang layei bak tangke leukang,
tan le soe pandang meu siblah mata,
seubab di pateih rayuan kumbang,
madu didalam hanle meu gisa,

wahe cut adek bungoeng lamkarang,
dalam meupacaran beik salah cara,
beik salah tingkah meu gaseih sayang,
singeoh meulanglang gadeoh peuyang na,

beik peusalah angein ban putoeh layang,
beik peusalah kulam ban eungkoet hana,
beik peusalah ureung chiek hana geularang,
beik peusalah kumbang teuga meunggoda,

wahe adek loen sahbat loen sayang,
jaga droe intan dalam meu cinta,
beik ban takaleon gaya that garang,
uroe ngeon malam gata teurlena,

seubab jai that~that rata jeut simpang,
duem keujadian di poeh le massa,
ladoem di teumeung dalam beurandang,
dua ngeon cut bang teungeoh keurija

Karya : Al Azzin