AZEUB JEUNAZAH

Dengan Bismillah, di lei awai phon.
Syukur keu Rabbon, keusidroe Allah.
Seulaweut saleum, geutanyoe himpon.
Pengikot kaom, sit Rasulullah.

Keu pangkai adab, Assalamu'alaikom.
Keu sahabat lon, peuneujut Potaullah.
Neusuot saleum, dilei awai phon.
Mangat meusambong, saboh ukhuwah.

Ban lheuh meugreb, lon layang panton.
Keunoe lon lambong, dalam risalah.
Saboh haba, karangan ulon.
Asoe panton, azeub jeunazah.

Hudep didunia, bek laloe bak mbong.
Neuduek ateuh tong, neupoh beurakah.
Beuna neuingat, singoh akhe thon.
Watei geulambong, lam tanoh mirah.

Nibak tahudep, neupujoe rabbon.
Wajeb hai kaom, tapujoe Allah.
Yang perintah, geutanyoe sanjong.
Larang Rabbon, peujioh teugah.

Kiban keuh hideh, dengan Makarong.
Soal geupeutron, maksut geupeugah.
Meusoe suot, hai wareh kaom.
Nyoe tan tajunjong, amai takeubah.

Nyoe tan ilmei, meubulei hidong.
Azeub geuhimpon, ka oleh Allah.
Cukop that saket, siksa Makarong.
Han pat lakei tulong, hai rakan sahbah.

Sangkira deuh, neukalon lansong.
Siksa geulambong, ateuh jeunazah.
Niscaya sadar, ban mandum kaom.
Neuklik neuranggong, teuhah di babah.

Alah hana deuh, bak mata lansong.
Azeub geupeutron, lam tanoh mirah.
Miseu bit deuh, Allah hai Po lon.
Peudeh that untong, lam tanoh beukah.

Beudoh jinoe, wajeb ta puphon.
Langkah tahayon, tapujoe Allah.
Nibak buet brok, keudeh ta sinthong.
Keudeh talambong, bekle takeubah.

Beuna tapateh, Allah Khadiron.
Yang Maha Agong, sit sidroe Allah.
Bek singoh, nyesal rakan lon.
Watei geukubor, jeut keu jeunazah.

Meutanle guna, tamoe taranggong.
Talakei tulong, han meupat peugah.
Nyan keuh didunia, hinoe ta puphon.
Tapujoe Rabbon, tiep tiep langkah.

Akhirul kalam, akhe bak panton.
Meuah keu ulon, meunyoe na salah.
Maklum lon tuan, baroe meupuphon.
Belajar panton, peugot risalah.

Karya : Khairul Muna