MEUSYEN NGON RIHON

Teubiet boh pisang leukang boh jantong
Oh abeh reubong teudong trieng dara
Ho gata aneuk yg poma kandong
Ho gata arong golom meugisa


Meunyo na tuwah siwah ngon rincong
Peudueng lam sarong mata meulila
Meunyo na tuwah bagah saweu long
Meunyo na untong rijang ta gisa

Tajak ugunong takoh trieng beutong
Ngon trieng goe payong keu gaseu bara
Tajak meuranto ta kubah gampong
Takubah karong wali syedara

Meuri ri ale yg peuceh teupong
Meuri ri lusong yg krak meukuba
Meuri ri aneuk balah jitulong
Meuri yg kandong,tiri na tanda

Arong arong kapai ji arong
Layeu tuhah glong tinggai kuala
Jantong jantong bohate jantong
Gata aneuk long,meusyen that poma

Sigak meuhaba si aneuk tiong
Sigak ji alon di leuk baguna
Teu ingat seudeh hai intan payong
Masa meukandong hingga ka muda

Sidroe droe aneuk umpama payong
Beu ek meutulong ayah ngon poma
Jasa ureung syik wahe e tanglong
Bagoe meugulong ie bakat raya

hayon hayon ku ikat hayon
Gata kurihon bungoh ngon sinja
Kunjong kunjong bagah ta kunjong
Poma di gampong ka roe ie mata

Pade e pade,pade dlm krong
Kusak dlm tong keubah keu gata
Bagah tagisa hai aneuk kandong
Seulama untong poma na nyawa

lon pula meulu di bineh anjong
Bak capa bakong bak capa paya
gata aneuk cut nguren lam jantong
Teu ingat di long manyak dile na

Wate gata klik ku sanjong sanjong
ku usong usong ku do da doda
Ka iem e hai nyak bek le ka ranggong
Ji cok le burong yeh pat dilua

Gata pih ta iem ka tanyong lansong
Kiban keuh burong wahe e poma
Poma meujaweub badan ube krong
Meupruet jih busong mirah ngon mata
 
Jiduek jipreh preh di yub keurundong
Jideuk ban patong geugasi raya
Jideuk jipreh preh aneuk miet ranggong
Jideuk teurupong ureung yg moe ma
 
Alah aneuk cut bohate jantong
Pajan ka kunjong poma ka tuha
Yoh mantong rayek laba ngon untong
Yoh mantong dilon kuturi gata
 
Tajak u lampoh takoh bak rambong
Tatukai jagong meuriti banja
Sabe ku kubah si on ija krong
Sileuweu puntong ku ingat gata
 
Lon ngieng utimu leumah beulitong
Lon ngieng ta kunjong pulo sumatra
Lon preh gata ta tron di lampong
Lon preh di gampong di aceh raya
 
Lon preh dirumoh maguen on murong
Lon preh di jurong ngon tungkat langa
Lon preh gata wo tapeudap tampong
Lon preh di anjong meubu ngon sira
 
Hana lon harap euncien ngon kalong
Hana lon rihon pirak peurmata
Yg poma harap beukeuh teume com
yo goh keuh dilong dlm keurunda

Karya : Polem